एउटै मञ्चमा धेरै थरीका भेषभूषा, ती पनि परम्परागत महत्त्व र पहिचान बोकेका। विराटनगरमा सोमबार यस्तै किसिमको परिवेश थियो। परम्परागत जातीय पहिचान जगेर्ना गर्ने उद्देश्यले १८ जातिका भेषभूषा प्रदर्शन गरियो। नेपाल आदिवासी जनजाति महासंघमा आबद्ध पूर्वका १८ जातिले एउटै मञ्चमा भोषभूषा र संस्कृति प्रदर्शन गरेका हुन्।
महासंघ विराटनगर नगर समन्वय परिषद्का अध्यक्ष सुरेशसिंह गन्गाईले आदिवासीको पहिरन विस्तारै समाजबाट हराउन थालेकाले अभियानकै रूपमा सांस्कृतिक कार्यक्रम आयोजना गरिएको बताए।
उनले भने, 'अहिलेको पुस्ता आफ्नो भाषा र संस्कारप्रति जानकार हुन छाडेकाले पनि हामीले साझा प्रदर्शनी गरेका हौं।' महासंघले विभिन्न जातीय संगठनसँग मिलेर पनि संस्कृति जगेर्नाको काम गर्दै आएको सिंह बताउँछन्।
कार्यक्रममा आदिवासी जनजाति समुदायको जातीय गहना पनि प्रदर्शन गरिएको थियो। कार्यक्रममा धिमाल, गुरुङ, राई, किरात, गनगाई, ताजपुरिया, भुजेल, तामाङ, नेवारलगायतका समुदायको पोसाक र संस्कृति प्रदर्शन गरिएको थियो। कार्यक्रममा जातीय संस्कारको विषयमा जानकार गराउन स्टल पनि राखिएको थियो।
कार्यक्रममा धिमाल नाच, लाखे नाच, ढोल नाच, धान नाच पनि प्रदर्शन गरिएको थियो। भेषभूषा प्रदर्शनी उद्घाटनपछि विराटनगर उपमहानगरपालिकाका कार्यकारी अधिकृत गोपालप्रसाद रेग्मीले नेपाल बहुजातीय मुलुक भएकाले देशका हरेक कुनाकन्दरामा रहेको संस्कृति र संस्कार बचाउनु अहिलेको चुनौती भएको बताए।
Nepalese Rupee Converter
